|
|
Azərbaycan Dövlət Pedaqoji Universitetinin Tarix Fakültəsinin - Ümumi
Tarix Kafedrasının Web Səhifəsinə - "XOŞ GƏLDİNİZ!".
Əziz valideynlər, tələbələr, professor-müəllim heyəti, o cümlədən, Azərbaycan xalqının
dəyərli ziyalıları! Sizi Azərbaycan Dövlət Pedaqoji Universitetinin Tarix Fakültəsi
- Ümumi Tarix Kafedrasının Web Səhifəsində salamlayaraq hamınıza - "XOŞ GƏLDİNİZ!"
deyirəm.
Tarix Fakültəsi - Ümumi Tarix Kafedrasının Web Səhifəsi Sizin xidmətinizdədir.
Arzu və istəklərinizi, sizi düşündürən məsələləri, sualları history_general@aspu.az
elektron poçt ünvanı ilə bizə çatdıra bilərsiniz.
Tarix Fakültəsi - Ümumi Tarix Kafedrasının Web Səhifəsi Azərbaycanın ali pedaqoji
təhsil tarixi ilə maraqlanan tədqiqatçılar, müəllimlər, tələbə və geniş oxucu auditoriyası
üçün daha da maraqlıdır.
Odur ki, elektron məktublarınızı səbirsizliklə gözləyirik.
Tarix Fakültəsi - Ümumi Tarix Kafedrasının Müdiri,
Azərbaycan MEA-nın müxbir üzvü, prof. V.H.Əliyev
|
|
|
|
|
UNİVERSİTETİN TARİX FAKÜLTƏSİ - Ümumi Tarix Kafedrası
Ümumi tarix kafedrası 1934-cü ildə «Qərb tarixi» (müdiri prof.P.P.Fridolin olmuşdur)
və «Yaxın Şərq tarixi» (müdiri prof. A.S.Bukşpan olmuşdur) kafedralarının bazası
əsasında təşkil olunmuşdur.
1937/38-ci tədris ilində kafedraya dos.Əşrəf Quliyev, sonra isə Kərəm Əbdürrəhmanov
rəhbərlik etmişdir. 1939/1941 və 1945-1953-cü illərdə «Qədim və orta əsrlər tarixi»
adlandırılan bu kafedra dos. Ə.S.Sumbatzadənin rəhbərliyi ilə fəaliyyət göstərmişdir.
Sonrakı illərdə kafedraya dos. M.N.Şıxlı (1959-1971) və prof. Y.B.Yusifov (1971-1998)
rəhbərlik etmişdir. 1998-ci ildən etibarən kafedraya Azərbaycan arxeologiya elminin
inkişaf etdirilməsində böyük xidmətləri olan, Azərbaycan MEA-nın müxbir üzvü, prof.
V.H.Əliyev rəhbərlik edir.
Prof. Y.B.Yusifovun Qədim Şərq tarixinin tanınmış tədqiqatçıları arasında özünəməxsus
yeri vardır. Sankt-Peterburq (Leninqrad) Dövlət Universitetinin Şərq fakültəsini
bitirmiş və orada görkəmli tarixçi-alim, poliqlot, akademik İ.M.Dyakovanın elmi
rəhbərliyi ilə aspiranturanı müvəffəqiyyətlə bitirmişdir. Bu dövrdə qədim (şumer,
akkad, Elam, Urartu, fars, pəhləvi) və müasir fars dilini öyrənmişdir. O, həmçinin
alman, ingilis, rus, ərəb, tacik, əfqan, kürd və Dağıstan xalqlarının dillərini
öyrənməklə də məşğul olmuşdur. Y.B.Yusifovun «Qədim Şərq tarixi» (1993), «Toponimikanın
əsasları» (1987, şərikli) dərslikləri yüksək elmi səviyyədə və ilk mənbələr əsasında
yazıldığından tədrisin müasir tələblərinə tam cavab verir.
Prof. Y.B.Yusifov mixi yazılı qaynaqları və qədim Bizans mənbələrini araşdıraraq,
qədim Azərbaycan, İran, Urartu və Mesopotamiyanın şimal əraziləri ilə bağlı bir
sıra türk mənşəli tayfaların, ölkə, yer və hökmdarların adlarını müəyyənləşdirmişdir.
O, türk etnoslarının ta qədimdən bu geniş ərazilərdə yaşadıqlarını elmi dəlillərlə
əsaslandırmışdır.
Avropa irqinə mənsub olan prototürklər prof. Y.B.Yusifovun fikrincə, müxtəlif istiqamətlərdə,
o cümlədən Şərq istiqamətində yayılmış və Altay onların ikinci vətəni olmuşdur.
Prototürklər yerli Altay dilləri ilə ünsiyyətə girmiş və nəticədə burada monqol
irqinə mənsub türk etnosları yaranmışdır.
Prof. V.H.Əliyev Azərbaycanın ən qədim mədəniyyət ocağı olan Naxçıvan Muxtar Respublikasında
bu qədim diyarın tarixinin, maddi və mənəvi mədəniyyətinin geniş, hərtərəfli tədqiqinin
elmi əsaslarını yaratmışdır. O, həmçinin Abşeron, Ağsu, Astara, Lerik, Qazax, Xaçbulaq,
Füzuli, Şəki-Balakən və digər bölgələrin tarixi abidələrinin öyrənilməsi sahəsində
çox dəyərli elmi tədqiqat işləri aparmışdır.
Prof. V.H.Əliyev Azərbaycanın eramızdan əvvəl VII-V minillikləri əhatə edən neolit
və eneolit mədəniyyətləri, e.ə. IV-III minillikləri əhatə edən ilk tunc dövrü –
Kür-Araz mədəniyyəti, e.ə. II-I minilliklərə aid ilkin şəhər mədəniyyəti, Orta mum
dövrü – Boyalı qablar mədəniyyəti, Cənubi Azərbaycanın tunc dövrü mədəniyyəti, Azərbaycanda
qədim tayfa ittifaqlarının yaranması və təkamülü, piktoqrafik yazı mədəniyyəti,
qayaüstü təsvirləri və s. mühüm problem məsələlər üzərində geniş elmi-tədqiqat işləri
aparmaqdadır.
O, Azərbaycan tarixşünaslığında ilk dəfə olaraq Naxçıvan Muxtar Respublikası ərazisində
qədim şəhər mədəniyyəti abidələrini aşkara çıxarmış, qədim Azərbaycanın Mesopotamiya
ilə eyni dövrdə ilkin sivilizasiya ocaqlarından biri olduğunu sübut etmişdir. Onun
tədqiqatları Azərbaycanda ilk dövlət qurumlarının e.ə.IV-II minilliklərdə yarandığını
söyləməyə imkan verir.
Prof. V.H.Əliyevin fikrincə, Azərbaycanın və bütövlükdə Cənubi Qafqazın ilk sakinləri,
insan nəsilləri türk soy köklü etnoslar olmuşlar.
Azərbaycan xalqının etnogenezini məhz türkdilli etnoslar təşkil etmişdir.
Prof. V.H.Əliyev 50 ilə yaxın Naxçıvan MR ərazisində arxeoloji tədqiqatlar apararaq
500-dən artıq tarixi abidələr aşkara çıxarıb elm aləminə tanıtmışdır. Onun Naxçıvan
tarixi abidələrinin tədqiqatları əsasında əldə etdiyi nəticələr təkcə Azərbaycanın
deyil, eləcə də Qafqaz və Yaxın Şərq ölkələrinin qədim tarixinin bir sıra mühüm
problem məsələlərinin öyrənilməsi istiqamətində çox böyük elmi əhəmiyyətə malikdir.
Prof.V.N.Əliyevin «Azərbaycanın tunc dövrü, boyalı qablar mədəniyyəti» (Bakı, 1977),
«Qədim Naxçıvan» (Bakı, 1979), «Azərbaycanın orta tunc dövrü mədəniyyəti» (Bakı,
1991), «Naxçıvan» (Bakı, 2001), «Gəmiqaya» (Bakı, 2005) və digər monoqrafik əsərləri
Azərbaycan tarixişünaslığında xüsusi yer tutur.
«Naxçıvan» monoqrafik əsərində Naxçıvan diyarının tarixi ən qədim dövrlərdən bu
günə qədər öz əksini tapmışdır. Tədqiqatlarından Azərbaycan Milli Elmlər Akademiyasının
nəşrə hazırladığı «Azərbaycan tarixi» (7 cildlik), «Azərbaycan arxeologiyası» (6
cildlik), «Azərbaycan incəsənəti», «Naxçıvan folklor antalogiyası» və b. əsərlərin
yazılmasında istifadə olunmuşdur. Onun əsərləri bir sıra xarici ölkələrdə – Fransada,
Pakistanda, Rusiyada, Ukraynada, Gürcüstanda, Özbəkistanda nəşr edilmişdir.
Prof. V.H.Əliyev «Azərbaycan tarixi» və «Qədim dünya tarixi» (6-cı siniflər üçün,
Azərbaycan və rus dillərində, 2001) dərsliklərinin əsas müəllifi və elmi redaktorudur.
Prof. V.H.Əliyevin Azərbaycan tarixi və mədəniyyətinin beynəlxalq miqyasda təbliği
sahəsində xüsusi xidməti vardır. O, YUNESKO xətti ilə 1993-cü ildə Pakistanda keçirilən
Beynəlxalq elmi simpoziumda, 1994-1997-ci illərdə Azərbaycan Tarixi Tədqiqatçılarının
Müstəqil Assosiasiyasının Yunikol Xəzər LTD (ABŞ) və Azərbaycan Respublikası MEA-nın
birgə Beynəlxalq Bakı simpoziumunda, «Qafqaz və Mərkəzi Asiya Beynəlxalq Araşdırmalar
İnstitutu, Azərbaycan Tarixi Departamenti»nin konfransında, Naxçıvan şəhərində «Uluslararası
qaynaqlarda Naxçıvan» Beynəlxalq simpoziumunda, Tiflis şəhərində (1997-ci ildə)
«Qafqaz arxeologiyası: yeni kəşflər və perspektivlər»inə həsr olunmuş Beynəlxalq
konfransda, Ankarada ildə keçirilmiş Beynəlxalq simpoziumda (2001) və Türkiyənin
Van şəhərində keçirilmiş (2004) Beynəlxalq konfranslarda Azərbaycanın ilkin şəhər
mədəniyyəti və qədim mədəni-iqtisadi əlaqələri ilə bağlı elmi məruzələrlə çıxış
etmişdir.
Prof. V.H.Əliyev «Pakistan və Mərkəzi Asiya Elmi Assosiasiyası»nın və «Azərbaycanşünaslar
Müstəqil Birliyi Şurası»nın üzvüdür. Kafedranın professoru M.S.Həsənovun «SSRİ –
Qərb və Avropa təhlükəsizliyi» mövzusunda müdafiə etdiyi doktorluq dissertasiyasında
(1992), «Almaniya məsələsinin həlli və Avropa təhlükəsizliyi», «Avropa təhlükəsizliyi
problemi» (2000) monoqrafiyalarında, «Almaniya və Avstriyada 1848-ci il inqilabları»
(1993) adlı metodik vəsaitində bu gün bütün dünyanı narahat edən ciddi siyasi və
diplomatik məsələlər şərh edilir.
Hazırda kafedrada 12 nəfər (2 elmlər doktoru, professor, 5 elmlər namizədi, dosent,
2 elmlər namizədi, baş müəllim, 1 dosent, 1 baş müəllim, 1 müəllim) – professorlar:
V.H.Əliyev (kafedra müdiri), M.S.Həsənov, dosentlər: A.M.Nəbiyev, İ.Ə.Məmmədov,
Ş.S.Nuruzadə, S.M.Mustafayeva, N.S.Hacınskaya, B.A.Bəxtiyarov, t.e.n. baş müəllimlər:
A.Mehdiyeva, Ə.X.Əhmədov, baş mülləim N.S.Hüseynova və müəllim Y.P.Rüstəmzadə çalışırlar.
Yaradıcı Kollektiv
|
|
|
|
|
|
|
|
|