|
|
Azərbaycan Dövlət Pedaqoji Universitetinin Filologiya Fakültəsinin
- Azərbaycan və Dünya Ədəbiyyatı Tarixi Kafedrasının Web Səhifəsinə - "XOŞ GƏLDİNİZ!".
Əziz valideynlər, tələbələr, professor-müəllim heyəti, o cümlədən, Azərbaycan xalqının
dəyərli ziyalıları! Sizi Azərbaycan Dövlət Pedaqoji Universitetinin Filologiya Fakültəsi
- Azərbaycan və Dünya Ədəbiyyatı Tarixi Kafedrasının Web Səhifəsində salamlayaraq hamınıza - "XOŞ
GƏLDİNİZ!" deyirəm.
Filologiya Fakültəsi - Azərbaycan və Dünya Ədəbiyyatı Tarixi Kafedrasının Web Səhifəsi Sizin xidmətinizdədir.
Arzu və istəklərinizi, sizi düşündürən məsələləri, sualları philology_world@aspu.az
elektron poçt ünvanı ilə bizə çatdıra bilərsiniz.
Filologiya Fakültəsi - Azərbaycan və Dünya Ədəbiyyatı Tarixi Kafedrasının Web Səhifəsi Azərbaycanın
ali pedaqoji təhsil tarixi ilə maraqlanan tədqiqatçılar, müəllimlər, tələbə və geniş
oxucu auditoriyası üçün daha da maraqlıdır.
Odur ki, elektron məktublarınızı səbirsizliklə gözləyirik.
Filologiya Fakültəsi - Azərbaycan və Dünya Ədəbiyyatı Tarixi Kafedrasının Müdiri,
Prof. Himalay Qasımov
|
|
|
|
|
UNİVERSİTETİN FİLOLOGİYA FAKÜLTƏSİ - Azərbaycan və
Dünya Ədəbiyyatı Tarixi
Kafedrası
Kafedranın yaranması universitetimizin bir təhsil ocağı kimi fəaliyyətə
başladığı dövrə təsadüf edir.
Universitetin ictimai – lisaniyyət şöbəsinin tərkibində dil-ədəbiyyat bölməsi, sonralar
dil-ədəbiyyat, ədəbiyyat, ədəbiyyat-incəsənət, Azərbaycan ədəbiyyatı, Azərbaycan
ədəbiyyatı tarixi adı ilə fəaliyyət göstərib, bu gün Azərbaycan və dünya ədəbiyyatı
tarixi adı ilə fəaliyyət göstərən kafedraya ilk öncə görkəmli ədib, pedaqoq Abdulla
Şaiq Talıbzadə rəhbərlik etmişdir.
1924-cü ildə B.Çobanzadə, İ.Hikmət, C.Əfəndizadə, Y.V.Çəmənzəminli kafedrada işə
dəvət olundu.
30-cu illərdə kafedraya yeni qüvvələrin gəlişi başlandı. Ə.Nazim, M.Rəfili, H.Nəzərli
və M.S.Əfəndiyevin Azərbaycan və dünya ədəbiyyatı tarixi kafedrasında çalışmaları
təlim-tərbiyənin keyfiyyətinin yüksəlməsinə təkan verdi. Sonralar Ə.Sultanlı, M.Quluzadə,
H.Əfəndiyev, M.Əlizadə, Ə.Qarabağlı da kafedraya cəlb olundular. H.Araslı, M.Cəlal,
C.Xəndan universitetin ilk aspirantları olaraq kafedraya yeni nəfəs gətirdilər.
Ə.Nazim 30-cu illərin əvvəllərindən ədəbiyyat tarixi kafedrasının müdiri olmuş və
ədəbiyyat tarixi, ədəbiyyat nəzəriyyəsi fənlərindən mühazirələr oxumuşdur.
M.Rəfilinin də elmi-pedaqoji fəaliyyətinin mühüm bir hissəsi ADPU ilə bağlı olmuşdur.
Prof. M.Rəfili kafedra müdiri kimi ixtisaslı kadrların hazırlanmasında xüsusi xidmətlər
göstərmişdir. İ.Şıxlı və M.Həyətzadə Ə.Sultanlının rəhbərliyi altında xarici ölkələr
ədəbiyyatı ixtisası üzrə mütəxəssis kimi yetişmişlər.
Dos.Ə.Hüseynov 23 il filologiya fakültəsində rus ədəbiyyatından mühazirələr oxumuş,
fitri istedadı, şəxsi qabiliyyəti ilə respublika ictimaiyyətinin xüsusi marağında
olmuşdur. Onun «Sənət yanğısı» əsəri bu gün də elmi dəyərini qoruyub saxlayır.
Akademik H.Araslının elmi-pedaqoji fəaliyyətinin böyük bir hissəsi – 1933-1941-ci
illər dövrü bu kafedra ilə bağlı olub.
Azərbaycan ədəbiyyatı kafedrasına müxtəlif illərdə B.Çobanzadə, Əli Nazim, Məmmədsadıq
Əfəndiyev, Cəfər Xəndan, M.Rəfili, F.Qasımzadə, M.Məmmədov, P.Əfəndiyev, A.Hacıyev
rəhbərlik etmişlər.
Azərbaycan və dünya ədəbiyyatı tarixi kafedrası elmi fəaliyyətini bu gün «Azərbaycan
ədəbiyyatının aktual problemləri»nin tədqiqi istiqamətində qurubdur. Kafedrada Azərbaycan
ədəbiyyatı tarixinin XIX əsr, XX əsr və müasir dövrü müvafiq proqramlar, dərslik
və dərs vəsaitləri əsasında tədris olunur. Bundan əlavə «Türk və Şərq xalqlarının
ədəbiyyatı», «Şərqi slavyan xalqlarının ədəbiyyatı», «Avropa ədəbiyyatı» (yeni dövr),
«Ədəbi tənqidin tarixi», «Ədəbiyyatşünaslığın əsasları» və «Ən yeni Azərbaycan ədəbiyyatı»
fənləri də kafedra əməkdaşlarının hazırladıqları proqramlar əsasında tədris olunur.
Bu tədris fənləri də dərslik və dərs vəsaitləri ilə təmin olunmuşdur.
Prof. Himalay Qasımov 2003-cü ildən Azərbaycan və dünya ədəbiyyatı tarixi kafedrasına
müdir vəzifəsinə seçilmişdir.
O, «Ədəbiyyat nəzəriyyəsindən mühazirələr» (B., 1981), «Bədiiliyin meyarı» (B.,
1990), «Müasir Azərbaycan romanı: janrın poetika və tipologiyası» (B., 1994), «Müasir
Azərbaycan romanının qaynaqları» (B., 1994), «Azərbaycan şeirinin poetikası» (B.,
1996), «Müasir Azərbaycan ədəbiyyatında yaradıcılıq meylləri» (B., 1998), «Şəhriyarın
lirikası və etiqadı» (B., 1999), «Azərbaycan ədəbiyyatının yaradıcılıq problemləri»
(Bakı, 2004), «Şəhriyar poetikası» (2006, həmmüəlliflə), «Səməd Vurğunun poetik
dünyası» (2006) kimi dərs vəsaiti və monoqrafiyaların; prof. Abbas Hacıyev «Tiflis
ədəbi mühiti» (B., 1980), «Mirzə İbrahimov» (B., 1982), «Tiflis Azərbaycan teatrı»
(1984), «Yazıçı şəxsiyyəti və bədii qanunauyğunluq» (B., 1986), «Ədəbiyyatşünaslığın
əsasları» (B., 1988), «Sənətkarın yaradıcılıq fərdiliyi» (B., 1990), «Bədii əsərin
strukturu» (B., 1992), «Ədəbi növlər və janrlar» (B., 1994), «Ədəbiyyat nəzəriyyəsi»
(B., 1996), «Ədəbiyyatşünaslığın əsasları» (B., 1999), «Tiflis ədəbi mühiti» (rus
dilində, B., 1965), «Mirzə İbrahimovun yaradıcılıq yolu» (rus dilində, B., 1970),
«Ədəbiyyatşünaslığın əsasları» (yeni nəşr, B., 2005) adlı kitab, dərslik və dərs
vəsaitlərinin müəllifidir. 15-dək namizədlik dissertasiyasına rəhbərlik etmişdir.
Prof. M.Mustafayevin «Q.Zakir şeirinin sənətkarlığı» (1983), «XIX əsr Azərbaycan
satirik şeir nümunələri» (1983), «XIX əsr Azərbaycan şeirində lirika» (1988), «XIX
əsr Azərbaycan realist şeiri» (1993), «Q.Zakirin poetik dünyası» (2004); fil.elm.doktoru,
dos. E.Quliyevin «M.Şəhriyar. Gəldim sizi görməyə» (1992), «S.Tahir. Lirika» (1992),
«M.Şəhriyar. Heydərbabaya salam» ( 2004), «Türk xalqları ədəbiyyatı» (1998), «Mirzə
İbrahimov: Ədəbi-estetik görüşlər və sənətkarlıq məsələləri» (1997), «Türkiyə türk
ədəbiyyatı» (2003), «Şəhriyar poeziyası və milli təkamül» (2004), dos. R.Əhmədovun
«İsmayıl Şıxlı» (1982), «Məmməd Arif» (1986), «Azərbaycan dramaturgiyası yeni mərhələdə»
(1994), «S.Vurğunun dramaturgiyası» (1988), «Sənət və həyat» (2005), dos. T.Cavadovun
«Pedaqoji mühit və uşaq ədəbiyyatı» (1992), «Faciəli talelər» (1998), «Müasir Azərbaycan
romanının poetikası» (2005); dos. M.Nağıyevin «Azərbaycan maarifçi realist nəsri
və rus ədəbiyyatı» (1994), «Ç.Aytmatovun yaradıcılığı» (1996) kitabları öz dəyəri
ilə seçilir.
Hazırda kafedranın elmi potensialını 11 əməkdaş: 3 elmlər doktoru, professor; 1
elmlər namizədi, professor; 3 elmlər namizədi dosent; 1 elmlər namizədi, baş müəllim;
2 elmlər namizədi, müəllim; 1 müəllim təmsil edir: professorlar: H.Ə.Qasımov, A.M.Hacıyev,
M.Q.Mustafayev, E.H.Quliyev, dosentlər: R.M.Əhmədov, T.S.Cavadov, M.M.Nağıyev, elmlər
namizədi, baş müəllim: M.H.Nəcəfov, elmlər namizədi, müəllim: N.A.Məmmədova, T.Y.Rəhimli,
müəllim: T.M.Əzimova.
Yaradıcı Kollektiv
|
|
|
|
|
|
|
|
|