|
|
Azərbaycan Dövlət Pedaqoji Universitetinin Fizika Fakültəsinin -
Nəzəri Fizika Kafedrasının Web Səhifəsinə - "XOŞ GƏLDİNİZ!".
Əziz valideynlər, tələbələr, professor-müəllim heyəti, o cümlədən, Azərbaycan xalqının
dəyərli ziyalıları! Sizi Azərbaycan Dövlət Pedaqoji Universitetinin Fizika Fakültəsi
- Nəzəri Fizika Kafedrasının Web Səhifəsində salamlayaraq hamınıza
- "XOŞ GƏLDİNİZ!" deyirəm.
Fizika Fakültəsi - Nəzəri Fizika Kafedrasının Web Səhifəsi Sizin
xidmətinizdədir. Arzu və istəklərinizi, sizi düşündürən məsələləri, sualları
physics_theoretic@aspu.az elektron poçt ünvanı ilə bizə çatdıra bilərsiniz.
Fizika Fakültəsi - Nəzəri Fizika Kafedrasının Web Səhifəsi Azərbaycanın
ali pedaqoji təhsil tarixi ilə maraqlanan tədqiqatçılar, müəllimlər, tələbə və geniş
oxucu auditoriyası üçün daha da maraqlıdır.
Odur ki, elektron məktublarınızı səbirsizliklə gözləyirik.
Fizika Fakültəsi - Nəzəri Fizika Kafedrasının Müdiri,
prof. İ.H.Cəfərov
|
|
|
|
|
UNİVERSİTETİN FİZİKA FAKÜLTƏSİ - Mexanika və molekulyar
fizika Kafedrası
Kafedra «Nəzəri fizika və astronomiya» adı ilə 1977-ci ildə yaradılmışdır.
Kafedrada nüvə və elementar zərrəciklər fizikası, ulduzlar fizikası, bərk cisimlər
fizikası, nəzəri mexanika üzrə elmi-tədqiqat işləri aparılır.
Kafedraya müxtəlif vaxtlarda dos. R.Ş.Yəhyayev, prof. Q.İ.Səfərəliyev və dos. Y.M.Qasımzadə
rəhbərlik etmişlər.
1996-cı ildən nəzəri fizika kafedrasının müdiri fizika-riyaziyyat elmləri doktoru,
prof. İ.H.Cəfərovdur. O, elementar zərrəciklər və onların qarşılıqlı təsirləri sahəsində
tanınmış nəzəriyyəçi fizikdir. Elementar zərrəciklərin elektromaqnit və zəif qarşılıqlı
təsirlərinin bir sıra vahid modellərini irəli sürmüş, bu qarşılıqlı təsirlərlə şərtlənən
çoxlu sayda prosesin effektiv kəsiklərini hesablamışdır.
İ.Cəfərov xaricdə və respublikada nəşr olunan 150-yə qədər elmi əsərin müəllifidir.
Onun rəhbərliyi ilə 7 namizədlik və 2 doktorluq dissertasiyası müdafiə olunmuşdur.
Müxtəlif illərdə onun elmi nəticələri keçmiş SSRİ EA-sı və Azərbaycan EA-nın ən
mühüm nailiyyətləri sırasına daxil edilmişdir.
Dos. İ.Abutalıbovun nüvə sahəsində elektronun tormozlanma şüalanması və elektron-pozitron
cütünün yaranması, eləcə də maqnit momentinin keçid şüalanması sahəsində nəticələri
təqdirəlayiqdir.
Dos. Ü.S.Paşabəyova M.Bornun bərk cisimlərin izotrop halları üçün nəzəriyyəsini
anizotrop kristallar üçün ümumiləşdirmiş, ikioxlu kristallar üçün əks olma və udulma
spektrlərini müəyyənləşdirmiş və alınan nəticələri çoxoxlu kristallar halına tətbiq
etmişdir.
Ə.H.Babayev (AMEA-nın müxbir üzvü R.E.Hüseynov və mərhum S.M.Əzimovla birlikdə)
Günəş alışmalarının optik qalınlığını, elektron temperaturunu və emissiyasının ölçüsünü
stasionarlıq, ionlaşma tarazlığı və Saxa-Bolsman tənliklərindən istifadə etməklə
eyni vaxtda öyrənməyə imkan verən kompleks üsul təklif etmişdir.
Məlumdur ki, leptonların elektrozəif qarşılıqlı təsirlərinin vahid Vaynberq-Salam
modeli ikikomponentli neytrino sxemi üzrə qurulmuşdur. Bu nəzəriyyəyə müvafiq olaraq,
prof. İ.Cəfərov leptonların dördkomponentli neytrino sxemi üzrə vahid elektrozəif
qarşılıqlı təsir nəzəriyyəsini yaratmışdır.
Maraqlıdır ki, bu nəzəriyyə elə yeni, incə effektlərə gətirir ki, onların təcrübədə
öyrənilməsi bu gün də həll edilməmiş qalan vacib bir məsələnin həllinə işıq salardı:
təbiətdə nreytrino sxemlərindən hansı – ikikomponentli yoxsa dördkomponentli sxem
– həqiqətən realdır (görkəmli nəzəriyyəçi fizik akademik B.Pontekorvo İ.Cəfərovun
bu nəzəriyyəsini dördkomponentli neytrino sxemi üzrə pioner nəzəriyyə kimi yüksək
qiymətləndirmişdir).
Kafedra əməkdaşları tələbələrin təhsilinə köməklik məqsədilə bir sıra dərslik və
dərs vəsaitləri nəşr etdirmişlər: prof. İ.H.Cəfərov «Kvant fizikasına giriş», «Kvant
mexanikası» (R.Yəhyayevlə birlikdə), «Neytrino» (akademik N.Quliyevlə birlikdə),
dos. Ü.S.Paşabəyova «Statistik fizikadan məsələ və suallar» (R.Yəhyayev və Z.Vəliyevlə
birlikdə), «Statistik paylanmalar və onların bəzi tətbiqləri» (E.Eyvazov və İ.Əliyevlə
birlikdə), dos. İ.M.Abutalıbov «Nisbilik nəzəriyyəsinin elementləri» (R.Yəhyayev
və Y.Qasımzadə ilə birlikdə), baş müəllim Ə.H.Babayev «Praktiki astrofizikanın əsasları»
(S.Əzimovla birlikdə), dos. M.Ü.İsmayılov «Analitik mexanikadan mühazirələr», «Dinamikanın
əsas teoremləri», dos. F.Q.Zeynalov «Kurs və diplom işlərinin icra metodikası» və
s.
Hazırda kafedrada 7 nəfər: 1 elmlər doktoru, prof. İ.H.Cəfərov (kafedra müdiri),
4 elmlər namizədi, dos. M.Ü.İsmayılov, Ü.S.Paşabəyova, İ.M.Abutalıbov, F.Q.Zeynalov,
1 elmlər namizədi, baş müəllim – A.Ə.Nəbiyev və 1 nəfər baş müəllim – Ə.H.Babayev
fəaliyyət göstərir.
Yaradıcı Kollektiv
|
|
|
|
|
|
|
|
|